Deu 6 | NdeIBE | STEP | Le yiyo imilayo, izimiso lemithetho uJehova uNkulunkulu wenu angithuma ukuthi ngilifundise ukuyigcina elizweni elizachapha uJodani lilithathe libe ngelenu,

Deuteronomy 6

Thandani uJehova wenu

1 Le yiyo imilayo, izimiso lemithetho uJehova uNkulunkulu wenu angithuma ukuthi ngilifundise ukuyigcina elizweni elizachapha uJodani lilithathe libe ngelenu, 2 ukuze lina, labantwabenu kanye labantwababo abezayo bamesabe uJehova wabo ekuphileni kwenu ngokugcina izimiso lemilayo engizalinika yona, ukuze libe lempilo ende. 3 Zwana, we-Israyeli, njalo unanzelele ukuthi uyalalela ukuze kukulungele njalo wande kakhulu elizweni eligeleza uchago loluju, njengoba uJehova, enguJehova waboyihlo, walithembisa. 4 Zwana, we-Israyeli: UJehova uNkulunkulu wethu nguJehova munye. 5 Thanda uJehova uNkulunkulu wakho ngenhliziyo yakho yonke langomoya wakho wonke kanye langamandla akho wonke. 6 Imilayo le engikupha yona lamuhla kumele ibe sezinhliziyweni zenu.

7 Igcizeleleni kubantwabenu. Khulumani ngayo nxa lihlezi emakhaya enu lanxa lihamba ezindleleni, nxa lilele phansi loba nxa livuka.

8 Ibopheleni ezandleni zenu ibe luphawu, liyibophele lasemabunzini enu. 9 Ibhaleni emigubazini yezindlu zenu kanye lasemasangweni enu.

10 Kuzakuthi uJehova uNkulunkulu wenu eselingenisa elizweni afunga alinika oyihlo, walinika u-Abrahama, u-Isaka loJakhobe, ukuba bona balinike lina – ilizwe elilamadolobho amakhulu, aphumelelayo kodwa elingazakhelanga wona, 11 izindlu ezigcwele konke okuhle elingazange likuhluphekele, imithombo yamanzi elingazange liyigebhe, kanye lezivini lezihlahla zama-oliva elingazihlanyelanga kuze kuthi lingadla lisuthe,

12 linanzelele ukuthi alimkhohlwa uJehova, yena owalikhupha eGibhithe, elizweni lobugqili.

13 Mesabeni uJehova uNkulunkulu wenu, mkhonzeni yena yedwa lifunge ngebizo lakhe.

14 Lingabalandeli abanye onkulunkulu babantu elakhelene labo; 15 ngoba uJehova uNkulunkulu wenu, ophakathi kwenu, nguJehova olobukhwele kanti lokuthukuthela kwakhe kungalitshisa, alitshabalalise ebusweni bomhlaba.

16 Lingamlingi uJehova uNkulunkulu wenu njengalokhu elakwenza eMasa. 17 Nanzelelani ukuthi liyayigcina imilayo kaJehova uNkulunkulu wenu lezimiso kanye lezimemezelo aliphe zona. 18 Yenzani okuqondileyo lokuhle emehlweni kaJehova, ukuze konke kulihambele kuhle njalo lingene liyethatha ilizwe uJehova alithembisa okhokho benu ngesifungo, 19 lidudule zonke izitha eziphambi kwenu, njengokutsho kukaJehova.

20 Kuzakuthi ngokuqhubeka kwesikhathi nxa indodana yakho ikubuza isithi, “Zitshoni izimiso, izimemezelo lemithetho leyo iNkosi uNkulunkulu wethu alilaya ngazo?” 21 Wena uzakuthi: “Sasiyizigqili zikaFaro eGibhithe, kodwa uJehova wasikhupha eGibhithe ngesandla sakhe esilamandla. 22 Thina sazibonela ngawethu amehlo uJehova ethumele izibonakaliso lezimangaliso – ezinkulu lezesabekayo – phezu kweleGibhithe laphezu kukaFaro labo bonke abendlu yakhe. 23 Kodwa wasikhupha khonale wasiletha lapha ukuze asinike ilizwe alithembisa okhokho bethu ngesifungo. 24 UJehova wasilaya ukuba silalele zonke lezi zimiso lokwesaba uJehova wethu, ukuze sithole ukuphumelela lokuphila, njengoba kunje lamuhlanje. 25 Kanti-ke nxa sinanzelela silalela wonke umthetho lo phambi kukaJehova wethu, njengokusilaya kwakhe, lokhu kuzakuba yikulunga kwethu.”